وزيرة السياحة التونسية أمال كربول

وزيرة السياحة التونسية أمال كربول ... كانت معزّزة مكرّمة الشركات الالمانية و الفرنسية و الأمريكية الكل يقرّقوا بيها باش تخدم معاهم ... كانت جمعة في نييويورك ... جمعة في انجلترا ... جمعة في كوالالمبور ... جمعة في ريو دي جانيرو ... جمعة في اسطنبول ... راكمت خبرة 17 سنة في المجال السياحي ...



الجمعة اللي فاتت جاها تليفون من مهدي جمعة باش تولي وزيرة سياحة ... المرا وافقت ... و قالت يشرفني باش ننفع بلادي و نخدمها ... وصلت اليوم قدّام التأسيسي تحولت غلى عميلة و متآمرة على العرب و صهيونية و كافرة و قليلة التربية ! لا و تلقى نواب مستواهم 3 دلّ ... كيما القصاص يهنتلوا فيها و يبخصوا و يعايروا فيها بكل قلة حياء ...



هذا الكل على شبهة سفرها لاسرائيل و تمضيتها 24 ساعة في تل أبيب ... معناها 24 ساعة مشات في بعثة أمم متحدة لتكوين شباب فلسطيني من عرب 48 ! قضت 6 سوايع في استجواب مهين دفعها للعودة أدراجها في اليوم التالي ...



فقط في تونس ... واحد عندو 17 سنة خبرة ... يتحوّل لعميل بسبب سفرة دامت 24 ساعة ... بينما الشيخ راشد تستضيفوا منظمات صهيونية و يقعد شيخ ... الجبالي يعنق و يبوس في جون ماكين الصهيوني و يقعد قيادي و رجل دولة ... الصحبي عتيق يصوت ضد تجريم التطبيع و يقعد مناضل !